Ngā pūoho auahi

Ko ngā pūoho auahi anake tō reo.

Whakarangona tō reo, whakaritea āu pūoho auahi ki ngā whakaritenga māmā e toru.

  1. Mātaitia
  2. Kōwhiringia
  3. Whakairihia

Māitaitia āu pūoho auahi

Ka rite tonu te tangi mai a āu pūoho auahi mēnā e oraiti ana te pūhiko. Panonitia ngā pūhiko o ngā pūoho auahi katoa, kia neke atu i te kotahi te wā i ia tau. Ka taka te wā, me panoni hoki ngā pūoho auahi ake – ko te nuinga o ngā pūoho auahi tūroa ka tata atu ki te tekau tau te roa o te oranga.

Kāore he take o ngā pūoho auahi mēnā kāore e tika ana te mahi. Mātuatua ake nei te riterite o te manaaki i āu pūoho auahi e haumaru tonu ai tō whānau.

Me rite tonu te whakamātauria o ngā pūhiko

  • Arā noa atu ngā kāinga kua whai pūoho auahi e noho mōrearea tonu ana nā te hiko-kore, te korenga rānei o ngā pūhiko
  • I ia marama, whakamātauria te pūhiko mā te pēhi i te pātene whakamātau. Mehemea kāore e māmā ana te toro atu ki te pātene, whakamahia te kakau o tētahi puruma.
  • Whakaarohia te hokona o ngā pūoho auahi ine-aho tūroa. Ka tūteitia te auahi e ēnei mō ngā tau e tekau me te kore e mate ki te panoni i ngā pūhiko. Heoi, ko te painga atu mēnā e rite tonu ana tāu whakamātau, e mōhio ai e tika ana te mahi.
  • He āheinga ‘whakangū’ tō ngā pūoho auahi katoa hei whakangū mēnā he hapa noa te pūohotanga. Pēhia te pātene whakangū i mua tonu i tāu tunu e ngū ai te pūoho mō tētahi wā kua whakatauria kētia, i waenga i te 8 me te 15 mēneti, kei te āhua tonu o te momo.

Manaakitia ngā pūoho auahi 

Ka taea e te puehu me ngā para iti te whakararu i te mahi a ngā pūoho, nō reira me riterite te ngongo puehu i runga, i ōna taha hoki.

Te kōwhiri i tētahi pūoho auahi

Ine-katote, ine-aho 

E rua ngā momo pūoho auahi matua hei kōwhiringa – ine-katote me te ine-aho.

Kei te āki mātou i tāu whakauru i ngā pūoho auahi ine-aho tūroa ki tō whare. He āhua nui atu te utu engari inā te nui o ngā hua.

  • Ka tata atu ki te tekau tau e tūtei auahi ana.
  • Kua whakakorengia te hēmanawatanga o te whakatika i te ‘tangi ora-iti’
  • I te korenga ōu i hoko pūhiko hou, ka ea pai ngā nama e te mahi tonu a ngā pūoho auahi tūroa i tōna oranga.
  • E kore koe e mate ki te piki arawhata i ia tau ki te panoni pūhiko.

Kāore e taea ana e te pūoho auahi te rongo i te auahi mēnā kua katia te kūaha, nō reira e kaha āki ana mātou i te whakairingia o ngā pūoho auahi ki ia rūma moe.

Ko te painga atu ina ka whakairi i tētahi pūoho auahi ine-aho tūroa i te kauhanganui, e tata atu ana ki ngā rūma moe, kia pērātia ia papa.

Oranga-pūhiko, taura-hiko rānei? 

Ka taea e ngā pūoho auahi te ora mā te pūhiko, mā te tuitui rānei ki te hiko o te whare.

E āki ana mātou i ngā pūoho auahi taura-hiko, tā te take he haumaru ake. 

E āki hoki ana mātou i te herenga kotahitanga o ngā pūoho auahi. Nā tēnei, ki te rongo tētahi pūoho auahi i te ahi, ka tangi mai ngā pūoho katoa o te whare kia mataara ake ngā tāngata katoa o tō kāinga.

Te whakauru i ngā pūoho auahi 

He rerekē ngā momo pūoho e tika ana mō ngā wāhi rerekē o te whare. Ka tangi pōrearea mai ngā pūoho mēnā ka whakairingia hētia.

E rangona mārika ai te auahi, whakaurua he pūoho auahi ine-aho tūroa ki ia rūma moe, rūma noho me te kauhanganui o te whare.

E kaha ākina rawatia ana e mātou te whakairi i tētahi pūoho auahi ine-aho tūroa ki te kauhanganui, kia tata tonu ki ngā rūma moe. Ka taea ana, āpititia ētahi atu ano.

Kaua e whakairi pūoho auahi ki tō kīhini, rūma horoi, rūma horoi kākahu rānei, nā te mea he māmā noa ka tangi hapa mai i ēnā rūma. Whakamahia kētia tētahi pūoho ine-wera.

 

 

  • Lounge: Rūma noho
  • Dining room: Rūma kai 
  • Kitchen: Kīhini
  • Bedroom: Rūma moe
  • Hall: Kauhanganui
  • Toilet: Wharepaku
  • Bathroom: Rūma horoi
  • Laundry: Rūma horoi kākahu

Whakapā atu ki te Tari Tīnei Ahi o tō rohe mēnā e hia āwhina ana mō ngā wāhi pai mō ngā pūoho auahi. Māmā noa te āwhina atu, kāore he utu.