Ngā tohutohu mehemea ka kite koe i tētahi ahi

Your Site Name

Ngā tohutohu mehemea ka kite koe i tētahi ahi

Mehemea ka kite koe i te auahi, i te ahi rānei, ā, e whakapono ana he mea mōrearea ki ngā tāngata, ngā whare rānei, waea atu ki a 111, ka pātai wawe atu ai mō te ‘Ahi’. Mehemea kāore koe i te tino mōhio mēnā he take ohotata tūturu, waea atu ki a 111 me te pātai atu.

Ki te paku māharahara, waea atu ki a 111.

Ngā taipitopito me whākī atu e koe ki te Ratonga Ohotata o Aotearoa

Kia waea atu koe ki a 111, ka pātai tētahi kaimahi ā-waea mehemea ko te Ratonga Patu Ahi, te Ratonga Tūroro, te Ratonga Pirihimana rānei tāu e whai ana.

Me pātai wawe atu mō te Ratonga Patu Ahi. Ka whai pea te Ratonga Tūroro me te Ratonga Pirihimana engari ko te mea nui kia karangatia tētahi waka patu ahi.

Me waea atu ki a 111 i ngā wā katoa mehemea e whai ana koe i tētahi waka patu ahi. Kaua e whakapā atu ki te tari patu ahi o tō rohe.

Koinei ngā mokamoka me hoatu e koe ki te Ratonga Patu Ahi, kia māmā ake ai te kimi i te ahi:

  • Te nama o te whare
  • Te ingoa o te tiriti
  • Te rīpekatanga tata
  • Te takiwā me te tāone
  • Tāu Tautuhinga Wāhi Noho Taiwhenua (Rapid number) mēnā kei a koe tētahi

Kia mōhio mātou i te wāhi o te ahi, ka pātai mātou mō ngā āhuatanga o te ohotata. Ka pātai pea mātou mehemea kua whara, kua mau rānei tētahi. Mā tēnei e mōhio ai mātou ka tae rite atu te hunga tuatahi i te taenga atu ki te ahi.