Ko tā tēnei tangata a Māui-tinei-ahi he whakaweto i te ahi. Kua whakaritea te hōtaka hei hōrapa atu ki ngā akoranga kura kaupapa Māori, me te nuinga o ngā kura reo rua hoki.

Kua whakaurua ki te kete rauemi ā-akomanga o Māui-tinei-ahi ētahi rauemi e ōrite ana ki ērā o Get Firewise mā ngā tau 1 me te 2, engari ehara ia i te whakamāoritanga kau noa o Get Firewise. 

Ahakoa he rite tonu ōna whāinga marutau ahi (te mōhiotanga ki te mōrearea o te ahi, ngā tikanga me whai ina tūpono mai te ahi, te parepare i te tākaro ki ngā pūahi me ngā māti), ka whakatairanga kē ngā rauemi o Māui-tinei-ahi i ngā tirohanga Māori, ka hono atu hoki ki Te Marautanga o Aotearoa (2008)(external link) me Te Aho Matua(external link)

I whakawhanaketia te hōtaka nei e ngā kaiako, ngā kaiāwhina, ngā Pou Takawaenga Māori o Te Ratonga Ahi me te Ohotata, ngā kaipatu ahi me ētahi atu kaiwhakaako.

Ka tukua e ngā kaiako, kātahi ka taunakitia ki tētahi whakaaturanga nā ngā kaipatu ahi, ngā Pou Takawaenga Māori me ngā ohu Tūraru ā-Hapori. He reo Māori te katoa.

Ko Māui-tinei-ahi he hōtaka tāwariwari, ā, ka taea kia whakamahia hei kaupapa wā poto, e whakapau nei i ngā hāora reo matatini me ngā hāora kaupapa i roto i ngā wiki e rua, e toru rānei. Ka taea hoki kia whakamahia hei kaupapa ā-kaupeka mā te whakamahi i tētahi huarahi ako pakirehua. 

Ko tā Māui-tinei-ahi he whakatairanga i tō mātou utanga ki te mahi tahi ki te Māori, hei tangata whenua. Ko tāna hoki he whakamana i tō te Māori homai ki te ārai ahi, tana poipoi i te aumangea o te hapori me tana ārahi i ngā urupare ohotata huri noa te motu.

Mēnā he pātai āu mō tēnei hōtaka, a Māui-tinei-ahi, whakapā mai ki tō mātou tīma ki māori@fireandemergency.nz.

Ka aronui a Māui-tinei-ki tā te tauira:

• mārama ki te tūpono mōrearea o te ahi
• āheinga ki te whakaatu mai i tōna mōhio ki te ārai i te hikanga mai o te ahi
• āheinga ki te whakaatu mai i tōna mōhio ki te puta i te whare e ngiha ana i runga i te tere me te haumaru, me te tae atu ki tētahi wāhi whakaemi haumaru.

Ka tutuki ēnei whāinga mā te whakaoti i ngā ngohe i raro iho nei.

Ka whakamahi pea te kaiako i tētahi, ētahi rānei o ēnei ngohe māmā ki te aromatawai i tana karaehe ki ia whāinga. Ka taea e koe te whakamahi i tētahi, ētahi rānei o ngā ngohe rerekē mō ngā aromatawai kohura me te whakakapi.