He whārangi tēnei mā ngā tamariki e hiahia ana ki te whakarite rautaki putanga mō tō rātou kāinga. Ka taea e ngā mātua te kimi pitopito kōrero anō i tā mātou aratohu whakarite rautaki putanga rānei, i te kōrerorero ki āu tamariki mō te haumarutanga-ahi rānei.

 

He rautaki putanga kei tō kāinga?

Kei te mōhio koe me aha mēnā ka kā mai tētahi ahi i tō kāinga, ā, me tere puta koe?

Ko te tikanga ia he rautaki putanga kei ia kāinga. Mā tētahi rautaki putanga e mōhio ai koe me pēhea te puta i te whare ki te kā mai he ahi.

Inā te wera, te tere o te ahi. I tētahi ahi, ka nui te auahi. Ka tino whakapōuri tēnei i tō whare. Kua moe pea koe i te kānga mai o te ahi, ā, ka whakaohongia koe e tāu pūoho auahi.

Mehemea he rautaki putanga tāu, ka mōhio koe mā hea e puta tere ai koe i te whare.

Te whakarite i tētahi rautaki putanga

Ka taea e koe te whakarite rautaki putanga mā te whakamahi i tā mātou rauemi whakamahere ā-ipurangi.

I a koe ka whakarite rautaki putanga, me mōhio rawa koe ki ngā putanga e rua mai i ia rūma mēnā e taea ana.

He mea nui kia mārama koutou ko tō whānau ki tāu rautaki putanga, ā, ka whakaharatau tonu ai.

Tīmata ai te nuinga o ngā ahi ki rō kīhini, rūma moe, rūma noho, me ngā rūma whānau. Me mātua whakarite koe i tētahi rautaki putanga mō ērā rūma. Me whakaharatau e koutou ko tō whānau te puta i ēnei rūma i ia 3 ki te 6 marama.

Kia mahara, he mea whakamataku, whakapōkaikaha te ahi i ōna wā engari mēnā koe e mōhio ana ki tāu rautaki putanga, e taea ana e koe te puta tere atu.

Anei ētahi atu pātai hei pātaitanga māu ki ngā pakeke ka noho ki tō whare:

• He wāhi huihuinga tō koutou i waho, pēnei ki tētahi pouaka reta, tētahi rākau motuhake rānei ka haere ai koutou ki te kā mai he ahi?
• He pūoho auahi ora tō tō whare?
• Kei te mōhio koe ki te nama me waea ki te tūpono mai tētahi ohotata, ā, me pēhea e karangatia ai ngā kaipatuahi?

Kia mahara, ki te kā mai he ahi...

E puta, ka noho ai ki waho!